‘Saamkyk na Jesus’ – (Silwer)

Hierdie paar opmerkings dien net as breë-trekke agtergrond aan die leser. Indien jy egter meer hieroor wil nalees, verwys ek jou graag na die bronne wat ek gebruik het soos gelys in die bibliografie aan die einde van hierdie artilel.

Die eerste drie boeke in die Nuwe Testament naamlik Mattheus, Markus en Lukas, staan bekend as die Sinoptiese Evangelies. Die woord sinopties wat ‘saamkyk’ beteken, het sy oorsprong in die Griekse taal. In wese kan gesê word dat hierdie drie sinoptiese evangelies ‘saamkyk  na Jesus’, beteken.

Alhoewel elkeen van hierdie evangelies die gebeure vanuit sy eie gesigshoek beskryf, sê hulle op die einde van die dag dieselfde oor die lewe en leer van Jesus.

In die evangelie van Mattheus staan Jesus as die Messias voorop, terwyl die evangelie van Markus Jesus uitlig as Seun en lydende dienskneg van God. Die evangelie van Johannes, (wat nie deel is van die drie sinoptiese evangelies nie), laat die klem weer val op die goddelike natuur van Jesus asook op die feit dat Jesus een is met Sy Vader (God).

Die evangelie van Mattheus is in hoofsaak op die Jodendom gerig, terwyl die evangelie van Markus, wat die oudste van die drie sinoptiese evangelies is, hoofsaaklik op die Romeinse lesers gerig was. Daarenteen is Lukas se evangelie in hoofsaak op nie-Joodse en Griekse lesers gerig.

Soos voormeld is die wonder van die sinoptiese evangelies dat alhoewel elkeen van hulle vanuit verskillende gesigshoeke na die dieselfde persoon naamlik, Jesus kyk, ons ’n volledige prentjie van die geboorte, lewe, leer, sterwe en opstanding van Jesus kry uit hulle ‘saamkyk,’ daarna.

Deur my indiepte bestudering van die drie sinoptiese evangelies asook die evangelie van Johannes het ek tot  die gevolgtrekking gekom dat Johannes in sy evangelie ’n unieke benadering tot die lewe en bediening van Jesus het.

Daar is byvoorbeeld nie een van Jesus se gelykenisse opgeteken in die evangelie van Johannes nie. Soos voormeld laat die evangelie van Johannes die klem val op die goddelike natuur van Jesus asook op die feit dat Jesus een is met Sy Vader (God).

Wat die sinoptiese evangelies betref is dit merkwaardig dat omtrent alle gebeure wat in die evangelie van Markus beskryf word ook in die evangelies van Mattheus en Lukas voorkom.

Daar is net drie insidente / gedeeltes wat slegs in die evangelie van Markus voorkom, wat nie in die ander twee sinoptici. (Mattheus en Lukas), opgeteken is nie. Hulle is  Markus 1:1, wat die inleiding tot sy evangelie bevat; Markus 4:26 – 29, waarin die gelykenis voorkom van die saad wat vanself groei; en Markus 8:22 – 26 wat Jesus se genesing van die blinde man van Besaida beskryf.

Daarenteen het die evangelies van Mattheus en Lukas verskeie gedeeltes wat nie in die evangelie van Markus voorkom nie, soos onderandere die  Bergpredikasie.

Hieruit word die afleiding deur Bybelkundiges gemaak dat Mattheus en Lukas die evangelie van Markus, (wat, soos voormeld, die oudste evangelie van die drie sinoptici is), gebruik het as bron vir hul ‘saamkyk’ na die lewe en leer van Jesus.

—————————————-oo00oo———————————-

©Pieter Mostert                     

                                                    Bibliografie

• Bailey, M.L. & Constable, T.L., 1999, Nelson’s New Testament survey, Thomas Nelson, Nashville.
• Blum, E.A., 1983, ‘John’, in J.F. Walvoord & R.B. Zuck (eds.), The Bible Knowledge Commentary: New Testament, pp 267-348, David C Cook, Colorado Springs
• Cole, R.A., 1989, The Gospel according to Mark: An introduction and commentary(Tyndale New Testament Commentaries, volume 2), IVP Academic, Downers Grove/Nottingham.
• Dake’s Anotated Reverance Bible Old and New Testament (1963) J. Dakes Dakes Bible Sales Inc. Lawrenceville, Georgia.
• Hiebert, D.E., 1994, The Gospel of Mark: An expositional commentary, Bob Jones University Press, Greenville.
• Joubert, S. 2012 Ontsluit die Nuwe Testament: Omvattende Bybelse Reis vir ’n beter verstaan van die Skrif. Christelike Uitgewersmaatskappy, Vereeniging.
• Martin, J.A., 1983, ‘Luke’, in J.F. Walvoord & R.B. Zuck (eds.), The Bible Knowledge Commentary: New Testament, pp 199-265, David C Cook, Colorado Springs.
• Van der Watt, Jan, Barkhuizen, Jan, & Du Toit Herman. (reds.) 2021 Interliniêre Bybel, Grieks – Afrikaans nuwe Testament: Vereeniging: Christelike Uitgewersmaatskappy.
• Vine’s Expository Dictionary of Old and New Testament Words (1971) F.F. Bruce. ed. Flemming H. Revelal Company, Old Tappan, New Jersey.

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag