KOM RY SAAM MET MY
Asseblief tog toe
kom ry saam met my dan wys ek jou
die son se lag as hy opstaan in die oggend
en die mis se lafaard strepe
as hy wegsmelt voor die somer se oggendhitte
Ry saam met my dan wys ek jou
die oopvou van ‘n oggend blom
as hy die nag se las afskud
en homself droog krul in die oggendwind
Ry tog saam en kyk deur my menswees oë ruit
as gisteraand se natuur regbanke
‘n onbesliste uitspraak gee
en nog ‘n veldmuis met ‘n saadlob huiswaarts keer
Verskoon die klippe en die stof
ry gerus net saam
tot oor die vlakwater bruggie
waar ons op die damwal se lang gras stil kan rus
Kom ons volg die toegegroeide spore
met my lewens huurmotor
en kom ons lag kommerloos
as dassies astrant hul pelsjas plooie vir die son ontbloot
Ag toe asseblief
kom ry ‘n bietjie saam met my
dan wys jou die son se glimlag
as hy agter kapok berge wakker word
Kom ons ry weer deur gister se lekkerkry paaie
kom ons ry na waar ‘n droom dag wag
lewenslus se oog in die heuwels lê
en ons vergeet van nie meer lag
…ag toe asseblief
Louie
Gebore by die see, verlief geraak op die berge / platteland en woon nou in die Vrystaat saam met my vrou Charmaine en 11 maande dogter Katelyn. Was deel van WOES se eerste bundle uitgawe van 2008 onder my tweede naam Gerhard. Vroeg "afgetreë" en hou myself besig met my "kunswerke". Werk ook deeltyds aan my eerste digbundel. Alle hulp en raad sal goud werd wees ...Ag en dan die legal ding: alle regte word voorbehou op geplaaste werke
4 Kommentare
-
-
Louie
Dankie vir die saam lees. Soms moet ons maar net tyd waak om weg te breek. Al is dit net stil raak met ons eie gedagtes. Groete Louie
-
-
Kiekies
Dis 'n uit-flippieng-stekende gedig!! Ek wil so graag ook inklim en saamry. Is daar plek?
-
Louie
Daar is altyd plek.... al moet jy op die roofrack sit... dankie vir die lees
-
Maak 'n opvolg-bydrae
Jy moet aangemeld wees om 'n kommentaar te plaas.
Cornien
Pragtig, wens soms ek kon so roekeloos raak om die daaglikse heen en weer agter te laat en net die natuur in al sy fassette in te drink en te beleef, elke sons opkoms elke grassie elke stof pad na vergeet pan.... pragtig!