Koperduif

In die rooiborsduif se kleure
stuur ek vir jou ‘n groet
sierskrif aan ‘n purper hemel
in lila, roos en goud

Met die lagduif se gesang
sing ek vir jou ‘n lied
‘n lied van liefde en van leed
van hoe ek na jou verlang

Ek stuur vir jou ‘n boodskap lief
in ryk kaneelgeur kleur
van hoop en moed en baie durf
en oor en weer probeer

My diepste wens stuur ek vir jou
met die koperduif se vlug
dat ons wense waar sal word
soos son op die koperduif se rug

Estelle Rubow
29 Augustus 2017