Laika (Brons)

laika (brons)

ek sit en kyk na die sterre

saam met my hond roxy en wonder

of jy die mensdom sien skitter

of proe als galbitter daar

waar jy staar deur ’n patryspoort

soos laika die ruimtehond lank-lank gelede

voordat haar kapsule die atmosfeer kon tref

is sy verhef van rondloperbrak van moskou

tot ruimtehond met internasionale sterstatus

beskou jy jouself as ruimtereisiger

waar sy haar weerloosheid gewillig

in jou hande (wat lansering voortydig loots) lê

en sy jou valse liefde onvoorwaardelik beantwoord

angstig

alleen

versaak

oorverhit

hartklop (tripli)seer

’n laaste blink-oog glim tevergeefs tussen sterre

grim lewensverwagting (jy het dit geweet)

snel verswelg atmosfeer muttnik

‘n hondelewe in ruil vir tegnologie, kennis en bates

apologie

ek poog al vir jare

om in vrede

na die sterre te kyk

sodat alles in my

weer kan rym

©Retha van Deventer, 2024.

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag