Lewenskring van ‘n ma en dogter

Die lewenskring van ‘n ma en dogter

Gelewer deur ‘n strakgesig man
het die nuus my hart bereik
en nes gemaak
wortels gegroei
om nooit weer los te raak
vir jou het ek met my saam gedra
‘n klein stukkie mens in my buik

Deur diepe waters en donker tye
het jy soos ‘n neet aan my vasgeklou
maar kleine handjies
het groot geword
en stadig my rokspant laat los
die wêreld het sy septer geswaai
jou van my weggelok

Al word jou gesig nou net ‘n skim
bly ‘n kamer in my hart
net vir jou bespreek
gevul met jou liefdesdinge
elkeen ‘n kleinnood met jou reuk
gevlek met my moederstrane
onder ander pyne weggesteek

Nou is dit die laaste strek na die einde
en jou plek bly steeds leeg
woorde van hoop
beloftes en smekinge
val op onvrugbare grond
die doodsengel swaai sy sekel rond
my hart nou vir ewig leeg

Kopiereg L Lexow 2018

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag