Magiese realisme
Magiese realisme
ʼn Kiewiet trippel rond
soos ʼn Beatle op Acid
“Lucy in the Sky with Diamonds”
drie treë vorentoe, wieg-wieg
linkerpoot in die lug –
in gitswart kykers
draai ʼn rolbos om en om.
Met my rug teen die growwe bruin
van ʼn perskeboom, bekyk ek die kring:
groen, onwrikbaar groen,
die lug het omgedop in dieper blou,
fyn haartjies op ʼn perske
ʼn takkie knak
en die vrug val in my hand.
Veerwolke valskerm
na ʼn sorgvrye tyd
met die smaak van kondensmelk
reën en son –
ek vergaap my aan die goddelose kaalkopman:*
“Do what thou wilt shall be the whole of the law.”
Winde tregter in my (wan)begrip
oor die gehekel van tyd,
splinter in simbiose
met die vormlose negende uur:
“Eloï, Eloï, lama sabagtáni?”
Ek struikel teen verganklikheid
maar omhels tóg ʼn blinde jaargety
in hierdie spasie
van magiese realiteit.
© Ernst Fernando dos Santos
* Aleister Crowley soos hy op die Beatles se Sgt. Pepper’s Lonely Hearts Club Band
album verskyn het.
4 Kommentare
-
Ernst
Baie dankie Francois
-
Inkmoderator
Ernst, dit is 'n grootte hierdie. Baie metaforiek, baie beelde, baie inligting en 'n magiese slot. Ek vind dit moeilik om jou werk te krit, nie omdat ek nie weet hoe om dit te doen nie, maar eerder omdat dit alleronnodig is. Jy is 'n slim skrywer wat presies weet waarheen jy die vers wil neem en in die meeste van pogings juis daarin slaag. Ek geniet jou werk baie en voel 'blessed' (jammer vir die engels) om daarin te deel. Skryfgroete IM
-
Ernst
Jy sit vanoggend 'n glimlag op my gesig met jou woorde - soos 'n druppel heuning op my tong :) Baie dankie IM, mooi dag vir jou :) :)
Maak 'n opvolg-bydrae
Jy moet aangemeld wees om 'n kommentaar te plaas.
Francois Meyer
Unieke samevatting van beelde. Ek hou hiervan!