Nare Waak

Nare Waak

Midde-in die straat
die geel en swart geveerde
bekkie wawyd oop
koppie neig na bowe
wanhopig val sy kreet
op dowe mense-ore

Neffens hom ‘n tweede stel
geel-swart origamivlerke
diagonaal deur impak
kunstig herrangskik

Daagliks speel dit af
tragedies in die kleine
onopmerklik onbewustelik
voor mense-oë, nikssiende

Vir die een wat die toneel
en slagoffers aanskou
stoot galbitter na bowe
‘n jammerlike waarheid
waaraan ons soms toe-oë klou
of meesterlik herskep:
Die trakeloosheid
wat die mens
van sy gewete red