Welkom, Besoeker
Welkom, Besoeker

Titel: Paashaas se geboorte. (SILWER)

Deur Marlene Erasmus
Datum gepubliseer: 29 April 2021 Aantal woorde: 398 165 Kere gelees 6

Paashaas se geboorte.

In die Romeinse gebied van Germanië woon daar ʼn wonderskone mooi jong dame, Eostre. Sy is nie ʼn gewone jong dametjie nie, maar sy is die godin van dagbreek en lente. Sy is baie geliefd onder haar mense en is ʼn vrolike, opgewekte blondekop. Waar al haar vriendinne vriende het, is Eostre die enigste vrou wat nog nie die liefde van haar lewe ontmoet het nie.

Die winter is hierdie jaar besonders koud en mistroostig. Die aarde kreun behoorlik onder die dik laag sneeu. Eostre sug hardop as sy daaraan dink dat sy lente na hierdie vreeslike winter moet terugbring na haar mense.

“Ek sal seker moet aanstaltes maak om hierdie winter te trotseer. Die tyd raak min en die kalender herinner my dat lente eersdaags moet verskyn.” Dit is tyd vir ʼn nuwe seisoen.

Vroeg-oggend verlaat haar vriendin, Treoné die huis, behoorlik gestewel en gespoor teen die koue. Sy trap diep spore in die sneeu en kom kort-kort tot stilstand om te rus. Die vars sneeu is korrelrig en dit laat mens nie so maklik gly nie.

“Wat se geluidjie hoor ek? Verbeel ek my nou”, wonder sy hardop by haarself. Sy staan stil en trek die mus se klappies effens van haar ore af om te luister. “Daar is dit weer! Ek het my beslis nie verbeel nie, ek hoor regtig ʼn voël hier onder in die sneeu. Sy voel met haar stewel en sien die arme beseerde voël Sy besef die voël is sterwend en sy moet iets doen om hom te help. Sy bid hardop en weet dat sy vir Eostre moet vra om te help.

Sy het skaars besluit om hulp te gaan soek toe daar uit die niet ʼn reënboogbrug voor haar verskyn wat die sneeu smelt. Voor haar staan Eostre en sy sien dadelik dat die voël so erg beseer is dat sy besluit om hom in ʼn spierwit haas te verander. Eostre maak net daar en dan ʼn belofte aan Treoné dat die haas een maal per jaar sal terugkeer met hope reënboogeiers! Die voorwaarde is dat die haas nie toegelaat sal word om die eiers te hou nie en dat hy die eiers moes uitdeel. Dit is hier waar die Paashaas se lewe begin het: in die gebied van Germanië met Eostre se hulp.

Daar word vertel dat die Paashaas nou Eostre se metgesel is.

©Marlene Erasmus
29/04/2021

(400 woorde)




TEMAS
1 Kommentaar
  1. Anze

    30 April 2021

    Pragtig, baie dankie vir jou bydrae tot die April 2021 – Oordenkingsprojek

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 93
Kommentaar telling: 5

Horison Media

AfriForum – Trotse borg van INK dig/skryf kompetisie

FAK – Trotse borg van INK dig/skryf kompetisie

Die Afrikaanse Taalmuseum & -monument – Trotse borg van INK dig/skryf kompetisie

Gebruikers Aanlyn

1 Lid, 92 gaste aanlyn

Bydraes – Argief