Ontvlugting

Ontvlugting

blomvelde mildelik geklee
in helder kleur karnaval
roep my uit grys en grou
van daagliks eentonig sleur

voëls se luidkeëls roep
lok na woude diepgroen
waar loerie met koddig kuif
wegkruip speel agter blaar

kabbelende waterstroom
streel ruwe rots en klip
helder water se rus wink
kom les jou dorre dors

leeu se maanhaar welig
luiperd in kolle kostuum
olifant se grootvoet spoor
zebra in streep gewaad
soveel mooi te waardeer

oor vlaktes wyd en oop
hang in lugballon stil
salig sielerus se vreug
moeë siel word gevoed
in rooi-oranje se gloed

© Marianne Buys
19 Junie 2021 06:26