Hemel palet

Die opwinding borrel diep binne in my
genadig is nog ‘n martelende week verby
die naweek ontvlugting lê voor die deur
weg van dit wat my rustelose hart versteur
in raadsale vergader werkslawe uur op uur
om geforseerde oorbodige opinies te verduur

Die pad huis toe is in donker gedagtes omvou
onversadige verkeer laat my gedagtes grou
kwalik opgewonde op pad Weskus toe
oor die kreef wat ek in my verbeelding proe
die vryheid van saligheid wat ek na smag
vry van die burokrasie wat ek daagliks verag

Op die Klipheuwel pad by Fisantekraal verby
sal jy die stank van die week se frustrasies kry
‘n laaste poging om jou geesdrif te smoor
om vir oulaas die geraas in jou kop te hoor
skielik ontbloot sy haar, verleidelik, onbeskaamd
in winters kleure is die natuur eerlik verwaand

Die Kaapse winterreën al was dit maar min
het met haar wonderwater haar kant gebring
die oeste het gewasse in oorvloed gegee
om opgewonde ‘n nuwe seisoen te betree
die velde wat pronk soos 'n windgat pou
noop my om op die pad na bevryding te hou

Malmesbury is ‘n waansinnige geskarrel
bevlek met gemors wat in die wind rond warrel
langs Dieprivier brug lê ‘n besope man
reeds in sy eie donker wêreld vasgevang
op die naat van sy rig lê hy in sy pyn en kwel
sy ewe dronk vrou wat hom van oorkant die pad skel

Uit die dorp se geraas en malle rumoer
wyk die kraaie wat in my kop rond sloer
net voor Rondomskrik se lowergroen plaas
word my kop stadig ontslae van al die geraas
voor my is die hemel doek ‘n kaleidoskoop
ten einde laaste word ek van die grou gestroop

Die helder oranje son in veelsydige kleure omring
skakerings van granaat wat die roesbruin indring
pampoen, mandaryn geel, lemoenskil en koraal
bloos appelkoos met kleure uit ‘n kinderverhaal
robyn pienk, bloue-pers-violet van ‘n aandblom
verdiep in die veranderende kleure wat my verstom

‘n Sierlike hemel tapisserie met sy warm palet
sonsondergang wat hom teen die donker verset
amarant of purper rooi wat uitdoof na framboos
lelie pers wat die wange van die wolke laat bloos
ek wil dit vasvang in woorde en met almal deel
op skrif vir almal met beeldende tafereel

Almal het al so ‘n kaleidoskoop gesien en ervaar
op sosiale media geplaas en soos ‘n gedagte weer laat vaar
‘n apatiese blik op die streel paneel van jou slim foon
teen die skoonheid van die natuur het jy jouself verloën
ek móét hierdie bekoring uit God se hand herleef
as ek maar kon dig soos Opperman of Boerneef