Brood (Goud)

Brood

Ek wou net brood koop,
wit – want ek hou nie van bruin —
ek was kieskeurig.

By die deur
gryp die wêreld my:
’n plakkaat wat gil,
’n vrou wat sente tel,
’n man wat sy hoop
teen afslagpryse verruil.

Die rakke is droogleeg,
soos ons Namibiese vlaktes.

’n Kindjie huil —
dalk nie van honger nie,
maar omdat haar ma
te moeg is om op te let.

By die kasregister
skuifel sy haar sente,
tel weer,
en bid saggies, stil.

Dit is te min
vir haar bruin brood.

Ek dink aan alles
wat ek al gekoop het
sonder om te tel.

Saggies gly my hand
om haar brood te betaal,
sit sommer lekkers by

Sy stap uit
met brood onder een arm,
die kindjie in die ander,
en in haar oë glinster daar hoop.

©MarleneErasmus

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag