Jongste aktiwiteit:

Die man wat ek liefhet

Die man wat my liefhet
slingerpad
deur veld en gras
en die fynbostakkies
wat – net gister nog –
sonder blomme was
bloem welig in ‘n welkomsgroet.

In die fluitsang van suikerbekkies
klink ‘n blye weersiensroep
oral
waar hy ou bekende paadjies loop
en – met sy hande –
ryp sade van graspluime stroop.

Die man wat my liefhet
is sterk en sonder skeet;
hy klim oor klip en rant
tot dáár
waar hy kan sien
hoe die witrûe* dans
op strome in die lug.
Hy ken elke voël van die hemel,
die aarde en die bos
se vleuels in hul vlug;
hy wis waar aasvoëls
bedags hul kuikens los
in neste
teen ‘n krans.

Die man wat my liefhet
loop al langs die vlei
by rietpolle, biesies
en wit lelies verby
tot waar swerms wildegans
op die water lê en rus.
Kormorante sprei hul vlerke
waar hul op geboë stompe staan
– draai rugkant na die son
wyl hy sy blik
oor vlei en voël
laat gaan.

*

En hy pluk ‘n bossie blomme,
hy maak ‘n ruiker in die veld
van suikerkan* en steenboksriet
net voor hy huis toe kom.

Want hy weet;
ek is die vrou wat hom lief het
en ek –
ek wag alreeds
vir hom.

© Carma Shaw

*witrûe – kransaasvoëls.
* suikerkan – speldekussing




Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)

1 Kommentaar

Maak 'n opvolg-bydrae

Up
Top Ranked Users

[joinup_core_top_members columns=”1″ space=”no” max_members=”3″ behavior=”columns” columns_responsive=”predefined”]

Activity Feed