genoeg

vanoggend se weer kom nog in
genoeglik sit hy op sy duin en tuur
na wolkies wat spoedig vergader

suur windjie waai en bring nog koue
oor vogtige baai en omliggende duine
meeue sweef laag en gaan sit eerder

gedagtes verstrengel in idees
wanneer is genoeg dan genoeg
vir fynbos is reën altyd welkom

vir vetplante is genoeg lankal te veel
oral blom daar geel, wit en rooi vygies
natuurlike veldblommetjies het begin

so het elke seëning sy plek en tyd
hoewel mense dit graag sal wil bestuur
kom dit telkens wanneer dit nodig is

donker wolke trek nou weer saam
ligte slietende druppels verjaag my nou
op binnelandse berge sak sneeu uit

laat my duin maar sy deel ontvang
my deel om kaggel-vuurtjie koppie koffie
koud maar dankbaar vir Sy genade

©Teárlach