Kleurvolle Josefskleed
Ek is een van die Evasvolk
wat bidblind broos
deur emosies kolk
soos wanneer die son
wil kartelbreek ook horison
dan tuimel ongebruikte
alfabetletters
in bont stiltes oor die
oewers van my praat
Hier hang ek verskeurde
lanferlappe van
anglisismes;
met engels bevlek
aan die winkelhak van
Afrikaanse genade
koop so ‘n nuwe vrede
Vreugdevol klee ek
myself met die HAT
en spelreëls van welleer
dan dans die letters in ink
soos ‘n kleurvolle Josefskleed
in ‘n nuwe jubelgesang
© Anzé Bezuidenhout
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...
4 Kommentare
-
Arnold
"Hier hang ek verskeurde lanferlappe van anglisismes; met engels bevlek aan die winkelhak van Afrikaanse..." so word ons soete taal verbruisel onder hierdie anglisismes. Hou hiervan.
-
neels
Anglisimes is deesdae so alledaags! as die mense wat dit gebruik maar net wil besef hulle vermoor ons pragtige taal
-
Viooltjie
Goed gedoen, Anze :-)
Maak 'n opvolg-bydrae
Jy moet aangemeld wees om 'n kommentaar te plaas.
Ina
Ai Anze dit is baie mooi...