Koue somer

Ek staan vanoggend op
na nog ’n lang nag sonder slaap;
buite hang ’n vreemde skemer –

dis somer, maar dit reën hier in die Kaap.

(Jy’s dan seker reeds op pad.)

Laas het jy gesê
jou tyd is baie min;
drie en vyftig dae, dan vlieg jy weg –
om (dalk) nooit weer terug te kom nie.

(En ek dink ek gaan verlang na jou.)

Ek koop potte vol van fynbosblomme
en rangskik dit in my tuin.
Ek stuur ’n foto
en wonder hoe lank ons nog sal praat.

Jy’t toe nooit kom groet nie.
Miskien is dit te seer.
Dis beter om te glo
dat jy vir altyd weg is –
(verskoon die trane in my oë).

Die nag was lank en donker,
vol van weinig slaap.
Buite hang ’n vreemde skemer.

En my kop sê
dit is somer,
maar vanoggend…
is dit koud hier in die Kaap.

© Carma Shaw
1 Februarie 2019
3:30