Latente lente
Waarom sou die Kaapse lente
hierdie jaar soos winter voel;
waarom sou sy plant en dier verkluim?
Dalk het sy ’n eed’le doel
wat sy verborge hou –
soos ’n verruklike, maar baie diep geheim.
Want tot dusver is die voorjaar
bloot canolageel karosse;
die son is net ’n silwer bal
wat êrens (verby flenterwolke)
deur die koue bloutes val.
En die lente hou haar asem op.
Sy dra ’n wit hoed op haar kransekop,
sy strompel tussen wingerd deur,
sy vly haar in ’n groen land neer.
Maar vlak skuil – onder winterrus –
haar blomhart in bont kleur gekus.
© Carma Shaw
16 September
22:26
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
Maak 'n opvolg-bydrae
Jy moet aangemeld wees om 'n kommentaar te plaas.