Lente
Lente
Half bevrore kraak ‘n wintergletser
met ysmos wat nog aan ingewande kleef,
snuif bloubokkie neus die soel poeiers
van ‘n bloeiseisoen in barensnood.
Kristalle glim op lippe van ‘n lenteson,
druip suikerstroop in sy skuifspeldloop
oor nuwe dou.
Stywe litte klou nog aan some van dooiemaan
toe bevrugting jakkalsdraf teen grense
van ‘n uitgediende winter.
Kreukeltraag ontpooi immergroen
deur ragfyn skede van blom en blaar
toe ‘n van Gogh palet van sonnegoud
kwahaal deur oopgerolde velde.
Louwarm draal ‘n nieugebore dag
in die deurkosyn van lewe
en spoeg dassie trippels op ‘n voetpad
wat heuwel in die rigting
van ‘n stuifmeel seisoen.
© Almarie Truter
2 Kommentare
-
Ronel Janse van Vuuren
Mooi gepen.
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, baie dankie vir jou bydrae tot die Lente projek