Ouder-ling

Ouder-ling

ek weet, my kind
my oë lyk dof en waterig
my glimlag dieper
en die malers is geslyp

kontoere dartel oor my gesig,
my nek
terwyl my stem stadiger
– krakeriger –
onder my afval-bril deur,
tog nog woorde spreek
ek-is-lief-vir-jou krete …

my eens trotse kroon
nou grys en yl
verwelkom nog steeds my knopvingers
as dié daardeur vrae vra
en my lopende gedagtes
wonder waar is tyd heen …

dieselfe hande het jou opgetel
op hierdie kromtoonvoete
het jy gedans
my oë was eens jou verkykers
vir ‘n mooi droomtoekoms:
dit was toe jy nog klein was
baksteenhoog klein …

my stem was jou nagneurie
tot jou vingertjies los raak
– slaap-raak –
in pappa se haredos
ja, vir geen oomblik wou ek jou ooit los …

vonkeluut is jy gebore
splinternuut was hierdie pa
terwyl Abba ons albei moes abba
al het ek vergeet om te vra

ek is steeds dieselfde mens
– net ouer –
soekend na liefde, omgee, aanraking
– na joune, my kind –

is ek op my oudag dan vir jou
net ‘n vernedering
‘n verstoteling
want  in jou wegbly
jou leë beloftes
raak jy ‘n vreemdeling

tik tok … ek word ‘n hemelling …

©Margaret Bennett
2/2/2023
Foto : Google

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag