Teen Wil en Sin

Teen Wil En Sin

Die oproep
was ‘n groot verrassing
so uit die bloute want jy het
gedink jy is lankal vergete—
Eers die uitruil van wedersydse welstand
van eie persoon en familie afgehandel,
volg vraag en antwoord,
informasie en reaksie—
Het jy geweet so en so is oorlede?
Nee nee, liewe aarde nee, wanneer?
Het jy geweet so en so het Alzheimersiekte?
Nee nee, liewe hemel nee, hoe erg?
Die een makeer dit, en die ander makeer dat,
en jy roep sielsongelukkig tot jou Skepper
Genade Here, genade, dis ou vriende en kennisse—
Die oproep het soveel hartseer gebring
en jy wonder by jouself,
wil ‘n mens alles weet,
moet jy alles weet
teen wil en sin?—

Janetta – Helena [Babs] ©