Tyd in fases (‘n Drievoudige triolet)

die jeugjare was nog jonk en lank
met tyd se tik ʼn polsslagdans
my visie was die bruis van vonkeldrank
die jeugjare was nog jonk en lank
waar die toekoms oor my heining rank
en groen krultentakel vir nóg ‘n kans
die jeugjare was nog jonk en lank
met tyd se tik ‘n polsslagdans

die werksmaande het traag verbygesnel
kalender se fotoblaaie afgeskeur
hul verbywens was my tronk se sel
die werksmaande het traag verbygesnel
met swoeg en sweet ʼn dosyn van hel
in saai roetine se greep meegesleur
die werksmaande het traag verbygesnel
kalender se fotoblaaie afgeskeur

die dae het in ouderdom min geword
‘carpe diem’ ʼn kosbare koestering
met uurglassand wat te vinnig stort
die dae het in ouderdom min geword
en tyd se tik-tak nou gans te kort
melankolie se terugblik ʼn vae flikkering
die dae het in ouderdom min geword
‘carpe diem’ ‘n kosbare koestering

Etna Wepener ©️