uit stof (silwer klas)

uit stof

daar staan die gestalte in die spieël

’n traan val skugter
vreemd en ver
losgeskeur van die aarde se atmosfeer

gedagtes vlieg omhoog
(in eensaamheid van hierdie breekbare heelal)
en raak so byna amper aan die
hemelblou-rant

’n vinger reik uit na die krake

die koue sypel deur beenmurg
en
vind dan onverwagte rus
in die warm droesem van onthou

die vrees vir die stof smelt weg

oë geanker in die eie blik
en in die brose krake –
die hersenskim:
net ek

© Pierce van Tonder

Digtersnota: uit stof
As digter plaas ek die krisis van identiteit en die bevryding van selfaanvaarding onder die vergrootglas. Die spieëlbeeld word aanvanklik as ’n vreemde “hersenskim” beskou—’n projeksie van foute waarvoor die mens na die hemel vlug. Dit is ’n reis vanaf eksistensiële vrees na die absolute vrede van genoeg wees.