Liefde onbeskryflik groot Silwer
in die ryptrap
van ‘n winterlandskap
haar wit gevlekte lyf
nakend in die holte
voetjies koud en styf
haar offer een van liefde
in die donker nag se klou
lippies wat eens rosig was
nou ‘n lewelose blou
in die ryptrap
van ‘n winterlandskap
geen spoor was daar te vind
eggo stemme in die donker
in die suising van die wind
saggies neurie sy ‘n wysie
om haar boetie knus te hou
en in die donker sluit haar oë
terwyl die koue haar omvou
in die ryptrap
van ‘n winterlandskap
slaap ‘n seuntjie onbewus
in die skuiling van ‘n miershoop
vind sy redder ewig rus
2 Kommentare
-
Seirdna
Pragtig Amanda
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, baie dankie vir jou bydrae tot die Junie 2022 Winterlandskap projek