anderse wêreld

 

 

’n dieper wysheid tref my

stadiger ritme in gejaagdheid

oë wat alles sien gebeur en hoor

wyer as die oggendlug wat waai

geen vergissing of verwarring

geen grimmering oor seer

laggend met albei hande

huil volmondig uit

seerste hart

ware mens

nie volmaak

maar so bitter eg

liefde vir hulle

soos asemhaal

nommer een-en-twintig

sing ’n ekstra lied

wat ongevraagd saamsing

in die koor van die lewe

tussen die wêreld

se maskers

en hoë

woorde

die spieël

van ons lewe

 

© Tearlach.

(Downsindroom – Mense word tipies met 23 pare chromosome in elke sel in hulle liggaam gebore – een helfte van elke chromosoom kom van die ma en die ander helfte van die pa. Hierdie chromosome bepaal hoe die kind lyk – of dit ’n seun of dogter gaan wees en fisieke en biologiese kenmerke soos haarkleur, oogkleur en die persoon se bloedgroep. Iemand wat met downsindroom gebore word, het ’n ekstra chromosoom (chromosoom 21), soms gedeeltelik en soms ’n ten volle ekstra chromosoom in elke sel. Terwyl mense met ander woorde gewoonlik twee nommer 21-chromosome per sel het, het iemand met downsindroom drie van hierdie chromosome.)