
As jy kan droom.
As jy kan droom.
Elkeen van ons het ʼn ingebore hunkering om eendag ons eie huis te besit. Toe ek ʼn jong meisie was, kon ek ure rondry en huise kyk. Die gewoonte is gevorm toe my pa ons op Sondagmiddag-uitstappies geneem het. Ons sou van Walvisbaai ry na Swakopmund om draairoomys te koop, dan het ons op super stadige spoed deur die mooi woonbuurte gery om al die huise te bewonder.
Ek onthou so goed die dag in ʼn vriendin se huis toe ek my verkyk het aan die groen prent teen die muur. Dit was vroeër jare ʼn ou Zam-Buk-advertensiebord wat kunstig ingespan is as ʼn fokuspunt. Hul huis was so mooi dat dit ʼn geweldige impressie op my gemaak het.
Ek het gedroom van ʼn groot kombuis met kersiehoutkombuiskaste en moderne oop ruimtes. My kombuis moes terselfdertyd modern wees, maar ook ʼn plaasgevoel skep.
Voorwaar het my drome waar geword toe ek en my man in ons eie woning ingetrek het. Grootoog en opgewonde is ons met baie van ons ouers se meubels in ons nuwe tuiste in. Kosbaarhede en oudhede laat my hart warm klop. Ek hou van moderne styl wat vermeng word met vervloë dae se sjarme.
Ek is verlief op oopplan-kombuis-en-leefareas. Dit voel warm en gesellig as almal saamkuier voor die gesellige kaggelvuur en die kinders speletjies sit en speel.
In ons huis sal jy dikwels vrolike klanke hoor van musiek en almal wat saam lag en gesels. Hier kan jy uitstap op die groot houtdek om die natuur te geniet. Die voëls baljaar in die bome en jy sal tarentale sit wat vrolik skrop op soek na kos.
Ek is gelukkig, ons het ons eie droomhuis gevind. Ons huis is ons woning, hier kraai ons koning.
©Marlene Erasmus
31/08/2022
(297 woorde)
1 Kommentaar
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, baie dankie vir jou bydrae tot die Augustus 2022 My huis is my woning projek