Die ou opstal se geheim 747 woorde Goud

Drie minute voor middernag. Die ou staanhorlosie se eentonige tik-tok trek hoederspoor in my nek. Vanaand sal ek die waarheid uitvind.

Vererg stuur ek die besem oor die sandspore in die kombuis.  Dis nou al die derde dag wat hier elke oggend ‘n duidelike voetspoor voor die ou koolstoof lê. Ou Mina het gewaarsku dat dinge nie is wat dit moet wees nie.  Sy was skoon omgekrap toe ek besluit het om die werkershut in ‘n ateljee te omskep. Gewapen met skoon lappe, skottels water en ‘n lang verestoffer het ons gou die plekkie in ‘n lushof omskep.  Al die meubels was onder doeke toegegooi. Alhoewel die meublement uit die jare toet was, was dit bruikbaar en het dit ‘n uniekheid aan die ateljee verskaf. Die koolstoof het warmte en ‘n eiesoortige nostalgie uitgestraal. Tog het iets omtrent die stoof bly karring.

“Mina, pasop man.  Die stoof is vrek swaar.  Stoot jy die kant dan sal ek trek. Die dekselse ding kan mos nie aan die vloer vasgemaak wees nie.”

“Ek het jou gesê ons moenie hier krap nie. Oupa Peet het net een keer die stoof gebruik en die ding toe taboe verklaar. Los die ding. Jy kan mos sien daar is geen manier wat ons hom geskuif gaan kry nie.”

Mina swaai die stoffer oor die stoof.

“Die ding lyk nog splinternuut.  Jy kan sien hy was nooit vir kosmaak gebruik nie. Ek sê jou dis net ‘n ornament hierdie”

Dit was vier dae gelede.  Nou sit ek hier in die donker.  Die volgende dag het ek weer ‘n draai kom maak. Die sandspore het weer die vloer vol gelê. Rondom die huisie was daar eens op ‘n tyd ‘n blombedding. Die roosbome het snaaks genoeg oorleef.  Met geen hand om hulle te versorg of water te gee nie, staan hulle tog in volle blom.  Die mooiste suiwerwit rose. Vreemd dat hulle ook net aan die stoof se kant van die huis groei. Mina wou nie verder help nie.  Sy het gesê dat slapende honde moet rus en dat die onbekende nie vir gewone mense soos ons is nie. Dit is juis die rede waarom ek om drie minute voor middernag hoendervleis vir ‘n stoof sit en staar.

Ek skrik toe die staanhorlosie se dong-dong die stilte versplinter. Versigtig skuif ek verder die donkerte in. Daar val ‘n ligstreep oor die houtvloer.  Was dit daar? Ek is seker die gordyne was dig toegetrek. My bene kramp en ek trek my rug regop.  Dit is al ‘n volle vyf minute. Wat ook al hier rond sluip is defnitief nie tydgebonde nie. Twaalf uur is mos die onbekende uur. Die tyd van misterie. Ek stut myself en druk op die koue vloer op presies dieselfde tyd wat die agterdeur kraak. Vries!

Die maan val deur die deur. ‘n Donker figuur sluip na die stoof se kant toe, druk teen die muur en staan eenkant toe. Ek trek my asem in. Die stoof beweeg. Dit lig ‘n paar sentimeter voordat dit geluidloos oor die vloer skuif. Daar moet ‘n trap wees want my gas verdwyn agter die stoof in. Ek wag nie verder nie, vlieg soos ‘n vlakhaas uit my springblokke en trippel na die kant van die stoof.  Die trappe is duidelik sigbaar.  Klein liggies flikker in die donker diepte.  Versigtig loer ek, maar daar is geen teken van lewe nie. Voetjie vir voetjie waag ek dit na onder. Die hoender hardloop nou kaalpoot oor my rug. Tyd staan stil. My skoene kras oor sand en voor my verskyn ‘n helder konkavuur.  Dan trap ek skeef en proe die sand op my tong. ‘n Sterk hand trek my op.

“Waar is ek? Watter plek is die?”

‘n Skel laggie vul my ore voor die donker oor my toesak.

Die koue lap ruk my terug na die hede.  Mina se bekommerde gesig is teenaan myne.

“Vir wat lê jy hier op die vloer.  Jy sal my mos ‘n hartaanval gee.  Goeie genade mens voel hoe koud is jy. Het jy heel nag hier op die vloer loop slaap? A nee a”

Ek skud my kop.  ‘n Dowwe hoofpyn klop aan my slape.  Het ek dan gedroom? Ek stut my hand teen die vloer en druk myself regop. Die stoof staan nog presies waar hy was. Miena prop ‘n beker tee in my hande. “Jy moet jou ophou kwel oor die onbekende.” Dan skuifel sy by die agterdeur uit. Die sandspoor van haar tekkies duidelik sigbaar voor die stoof.

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag