Die vrug van geduld en goedhartigheid

Die vrug van geduld

 

o Heer, soveel keer word my lankmoedigheid beproef

soos in soveel ander lande het ons emosies in Suid-Afrika

tydens grendeltyd wipplank  gery

met die bekommernis oor ons toekoms

oor ons lewensonderhoud en toekoms wat wag

 

Heer, leer ons van lankmoedigheid

om moed te hou in tye van teenslae

geduldig te wees op U tyd

vol te hou, aan te hou, moed te hou

 

leer my om nie gou kwaad te word

om die vrug van lydsaamheid te versprei

want U het aan ons aan die kruis gewys

dat ons vrug van lankmoedigheid ryp moet word

 

mag ons as landgenote mekaar vergewe

lankmoedig en geduldig wees met ons naaste

en dankie dat ander my gebreke en tekortkominge

verdra en om geduldig te wees op die vrugte wat ek dra

 

 en o Heer laat ek ook

 

 die vrug van goedhartigheid dra

 

deur vrygewigheid, hulpversorging en konsiderasie

sonder enige lof of beloning

waar ek met liefde my medemens help

met die mees genesende lewenskruie wat ek kan uitdeel

 

my voorbeeld kan die toekoms bepaal

is dit empatie wat ek my kinders moet leer

om goedhartig en behulpsaam te wees

en  om hul sielkundige welstand te verbeter

 

ek moenie dat my vyand honger gaan slaap nie

en as hy dors is moet ek hom na die water bring

sodat waar hy val of struikel ek hom kan ophelp

sal ek God se genade, leiding en seën verseël

 

ek moet gasvry wees en met die spreek van ‘n suiwer taal

sodat my goedheid se rimpeleffek God sal eer

en ek vervul sal word met die Heilige Gees

om eendag die Ewige Lewe te verseker

©kopiereg Linda du Plessis 2023