Die vrug van vriendelikheid en getrouheid

Die vrug van vriendelikheid

 

o Heer, vriendelikheid beteken nie net ‘n glimlag

‘n sagte woord, goedheid, dienende hande nie

maar dat ek die vrug van verdraagsaamheid moet baar

ander te vergewe soos U my vergewe

hulle ‘n kans te gee en nie te veroordeel nie

om hulle te help, te red en te lei

laat my verby ander se foute kyk

om my geliefdes, vriende en landsgenote

deur U in hulle self te laat glo

die beste van hulle vrugte voort te bring

 

Vader, laat vriendelikheid my hele menswees infiltreer

om bruikbaar, diensbaar, positief en nuttig te wees

dat U my toerus met ‘n geestelike metafose

uit my negatiewe en afbrekende kokon

sodat al die vrugte van my lewe soet en sappig

in die mond van my medemens sal smaak

 

en leer my die

 

Vrug van getrouheid

 

o Vader, ek faal so dikwels om die

vrug van vertroue, geloof en getrouheid

te dra en na ander te saai

dat ek met integriteit en volhardend

stiptelik, betyds my geloof laat ryp word

 

o Heer, leer my om eerlik te wees

leer my om getrou te wees aan U

getrou aan my lewensmaat

getrou aan my geliefdes

getrou aan my vriende

getrou teenoor my werknemers

getrou aan my beroep

getrou aan my passies en liefde

getrou hier waar ek woon

 

Mag U die Heilige Gees die vrug van geloof

en van vertroue in my lewe laat ryp word

leer my om as ‘n betroubare mens

trou in U diens sal bly staan

sodat ek my naam eendag

in die boek van die lewe sal vind

 

 ©kopiereg Linda du Plessis 2023