Hartedief

my seuntjielief
hartedief
met jou karnalliestreke
jou soet en stoutighede
met suikerbeksoentjies
kousies en skoentjies
jou kettie in jou sak
het jy sak en pak
met kuiltjies en laggies
o so saggies
voor ek my kon kry
diep binne in my hart kom bly

hier het ek vir jou
‘n vesting gebou
teen wind en weer
teen die lewe se seer
‘n hartkamer vol moederliefde
waarna jy altyd weer
terug kan keer
my seuntjielief
my hartedief