Koffieblom (Silwer)

Met nektar uit my koffieblom,
vroeg uit die vere,
voor die son opkom.

Drink ek die drome
van die nag,
tot dit wegspoel
as ‘n ademlose klag.

Besweer ek die vrese
voor my deur,
wat al rasend
aan my hart se grendel beur.

Stap ek deur die strate
van my dag;
deur die dinge
wat dalk nog op my wag.

Beleef ek die gawes
en die geur,
van die gunste en genade
van die Heer.

Met nektar uit my koffieblom,
los ek die lesings
tot die son opkom…