Ligteling
(goud)
Ligteling
Sal daar ooit weer só ’n tyd wees
soos toe ek kind was –
vry van klae en kommer,
geen kennis van die wee;
al wat ek onthou
is die pad na sonnestrande
en die duisende dae by die see.
Hoe warm was die strale teen my lyf,
hoe gewigloos kon fotone
hul heelalslig in my binnewêreld skryf.
Ek verbeel my soms die meeue bo die water,
blinknat sterre naas ’n rots
en hoe ongebonde branders breek
as dit skroomloos teen die swart klip bots.
Vroegaande was oranje,
elke oggend blou saffier;
my aarde was ’n paradys
en ék, ’n ligteling
krakensvol van lewensvuur.
© Carma Shaw
14 Junie 2020
Nuutskeppings
* Ligteling – positiewe persoon wat ‘lig’ voel van binne in teenstelling met iemand wat depressief en ‘donker’ voel.
* Krakensvol – so vol dat dit kan oopkraak
* Sonnestrande
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
2 Kommentare
-
Seirdna
Baie mooi. "Ligteling" is 'n uitsonderlike neologisme.
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, baie dankie vir jou bydrae tot die Junie 2020 – Vryheid projek