Musiekblyspel van onthou

Augustus 2023 Musiek projek:- SILWERKLAS

Musiekblyspel  van onthou

Daar was ‘n vals noot
in die ritmepatroon van jou oë
toe jy die lirieke van jou liefdesnote
toonset in die balk van my hart

noodgedwonge het jy weggestap
uit die strelende akkoorde van ons komposisie

die afwisselende wysies in die toonhoogtes
van jou gemoedstemming het die nootwaardes
in die harmonie van ons Maanlig Sonate versteur
en die melodie van my hart in flarde geskeur

omdat jy weggestap het
uit die strelende akkoorde van ons komposisie

het die strykstok van my viool gebreek
en het ek blind geraak vir bladlees van musiek
tóg weerklank die harp van jou skoonheid steeds
in elke stembuiging van die wind

en komponeer jou strelende hande konfettinote
in ons musiekblyspel van onthou …
———————-oo00oo——————-
(Pieter Mostert)
[konfettinote = ’n Neologisme
( konfetti assosieer met troues en note met musiek)]

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag