Nog nuttelose informasie (maar ek wou jou net laat weet het . . . ) 3
Dis nege in die oggend –
dit ruik na reën hier in die Kaap.
By ENGEN vlieg ‘n hadeda
oor die vulstasie se dak
en in die Quick Shop
staan Huisgenoot en Son
langs Engelse koerante op die rak.
Die Burger is vanmôre
vroeg reeds uitverkoop.
Ek drink koffie by die tafel
(langs ‘n venster) in die hoek
en skryf vir jou op my tablet . . .
Die geur van Cappuccino
meng met dié van ‘n pastei
en drie mossies trippelloop daarbuite
oor rooi plaveiselstene.
NASIONALE LOTERY
wapper phanda pusha play
op geel baniere in die wind.
Die petroljoggie is vol grappies
wyl hy skuim van motorruite skraap.
Dis tienuur op ‘n herfsdag.
En dit ruik na reën . . .
hier in die Kaap.
© Carma Shaw
31 Maart 2017
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
4 Kommentare
-
-
Viooltjie
Baie dankie Neels. Ek waardeer dit regtig baie :-)
-
-
Amaspoke
Mooi geskrywe, laat 'n mens so bietjie stil sit . . .
-
Viooltjie
Baie dankie vir die stilsit, Casper. Ek waardeer jou lees en kommentaar :-)
-
Maak 'n opvolg-bydrae
Jy moet aangemeld wees om 'n kommentaar te plaas.
neels
soos altyd leef mens jou in in jou skrywe Carma. pragtig geskryf