reëngebed

reëngebed

 

die aandwind het gekom om die dag se koors te breek

net toe die laaste lig ’n pastelvuur in die lug aansteek

 

ek het toe sag gefluister dat net die Here my kan hoor

en ek vra vir groot genade voor ons alles hier verloor

 

ek vra om hulp vir regop bly en vir riviere vol van hoop

en dat dit asseblief sal reën daar waar die diere loop

 

na al die somermaande staan die veld nog wintervaal

ons wag vir hemelwater om ons deur die jaar te haal

 

herfs begin sy kleure wys en die son het terug gedraai

maar ek vra fluistersag dat die wind nog reg sal waai

 

© Hester Steenkamp