Sielsalleen in Tyd
As baba aan moedersbors
was ek,
(anders as die wind)
maar altyd aan broer, suster,
man of kind –
magneties aan ‘n ander mens
vasgekors.
Maar na my Wederhelf se dood
roei ek so sielsalleen soos Adam
(voordat God vir Eva gemaak het),
nou skielik
my eie euforiese diepseeboot.
Vergaap ek my soos Rembrandt
aan die speelse bedrog
van lig en skadu
as die noorderson se kleedrepitisie
deur my feëriekvenster verskyn –
gaan ek hoog-hoog in sy patos op
tot bewoë sy afskeidslied
ryp-appelkoos
voor my oë wegkwyn.
En sawens in die groot dubbelbed
(ek slaap steeds aan die linkerkant)
duimry ek naelstringlos en
totaal ongeband
(verweg van Pa-en-Ma se trouportret)
deur die balsaalswier
van die groot kosmos
se sege-lourier.
Damp my asem ‘n bietjie hitte
teen die koue ruit
as God se Gees
so saggies deur my neusvleuels fluit
dryf, dryf, my siel
voort en voort en voort
in Sy ewigheid ………………
©Elizabeth Greef
6 Kommentare
-
-
Elizabeth Greef
Baie dankie Anze vir jou getroue saamlees. Ek voel skuldig omdat ek so skaars is, maar ek trek Vrydag na 'n ander dorp en dan is dit die groot uitpak. Hopelik kan ek vanaf September weer meer betrokke raak hier op Ink en my goeie vriende se goeie werke lees. geseende aand.
-
-
neels
uitstaande mooi Elizabeth
-
Elizabeth Greef
Baie dankie Neels, my ou Maat, waardeer altyd jou kommentaar!
-
-
Koekekranka
Geluk was inderdaad vanaand aan my kant want ek het jou hier raakgeloop en myself versadig aan hierdie prag werk van jou wat boekdele spreek! Baie dankie en jammer vir die laat inloer!
-
Elizabeth Greef
Baie dankie KK, ek waardeer altyd jou saamlees. Mooi aand verder!
-
Maak 'n opvolg-bydrae
Jy moet aangemeld wees om 'n kommentaar te plaas.
Anze
Hoendervleis mooi!!!