Jongste aktiwiteit:

. . . van brood alleen

agter koue mis se newels
word die son ‘n silwer bal
teen die hemel, tussen wolke
wat swerf en kleur in duifgrys
tot die edeltint van staal

my jas is dik, my stewels bruin
oor my skoot lê ‘n kombers
teen die vlootblou van my denim
skakeer ‘n trui in lilla,
violet en lintblompers

ek’s bly oor die Kaapse winter
met sy Noordweswind en weer
en hier – waar eens ‘n vleiland was –
vloei waters soos riviere
verby sypaadjies, oor teer

my houthuis het ‘n blink sinkdak
waarteen druppels klett’rend slaan
op dese plek (waar ek nou skuil)
het lelies wit – vervloë –
eeu’lank in die vlak gestaan

hoe warm vlam die paraffien
teen my hand en my gemoed
in leemtes tussen skamel woord’
rus nou ‘n stille vrede
is storms eind’lik uitgewoed

soos ééns staar’k deur skemer ruite
buite stroom die milde reën
deur ‘n grou wolk vliet ‘n sonstraal
die oomblik is (vir my) genoeg

dié vrou kan leef
. . . van brood alleen

© C. Shaw
3 Mei 2016




Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)

4 Kommentare

Maak 'n opvolg-bydrae

Up
Top Ranked Users

[joinup_core_top_members columns=”1″ space=”no” max_members=”3″ behavior=”columns” columns_responsive=”predefined”]

Activity Feed