Vervulling
Teen heug en meug het ek weer koers gekry
na ons rantjie waar geel botterklappers groei;
bosfisante skrop op soek na wildeprei
en patrysies tussen besembossies broei.
Neweltjies van halfslaap se lekstroompies
van terugverlang het in my nes kom maak
en effe-syverings uit loodregkransies
se stuif het ons, soos toet, deurnat nat gemaak.
En jy, met slierte hare teen jou wang
-net soos in feetjiessprokies wasig mooi!-
het teenaan my kom staan, naïef en bang,
met net ons hartklop wat jong liefde tooi.
Toe’t ek volkome klarigheid gekry;
was in my gemoed geen hink of huiwer
oor wat die onbekende toekoms ons berei
want in jóú was liefde puur en suiwer…
4 Kommentare
-
-
Koekekranka
Baie dankie!
-
-
Ronel Janse van Vuuren
Pragtig. Mooi prentjie wat jy skilder.
-
Koekekranka
Dierbaar van jou en baie dankie!
-
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, baie dankie vir jou bydrae tot die INK gedenkbundel projek