Wanneer Die Amarillas Blom.

Vir my Pa.

Wanneer Die Amarillas Blom. (Brons)

Wanneer Die Amarillas Blom. (Brons)

Wanneer die Amarillas blom

weet ek in my hart

die Lente het weer gekom

ek sien jou voor my geestesoog

en jy vertoef ‘n wyle weer

 

dan onthou ek jou

waar jy in die blombedding skoffel

die son wat koelbloedig brand

en jou fingers wat grawe in die sagte sand

hare windverwaai, kuif heel deurmekaar

die sweet wat op jou voorkop pêrel

 

ek onthou jou gekreukelde hande

wat liefdevol

oor die droë bruin kluite vee

vir wanneer die Lente

voor die Somer kom

om haar ondergrondse geheime te gee

die vaaltes met haar Skepperskleure te beklee

 

nat grond en kompos, genade

jy is dankbaar….

ek sien van binne na buite

jou hart wat oorloop van hoop

het ‘n glimlag van vergenoegdheid

oor jou stowwerige gesig geloop

 

Amarilla, wie het jou skoonheid

in duisternis aanmekaar geweef

wie het jou asemrowende prag bepaal

en jou met Lente uit die donker dieptes gehaal

 

die Roos, Angelier, Katjiepiering en Jasmyn

is jou, Amarilla, een voor

met hul parfuum wat vroue eeue al bekoor

jy is wel weeskind van geur

maar,

wat jy ontbreek in reuk

is jy geseën met prag dubbel prag

in wit, pienk en rooi

glinster jou skoonheid

wat die mensdom betower

jou blomblare wat blink

soos die fynste sy

Amarilla, mooiste mooi

van al die blomme is jy

en,

wanneer ek die die Amarillas sien blom

het jy weer vlugtig teruggekom…

Amarilla mooiste mooi

blomme kind is jy.

Vera Booysen ©

INK 28/05/2025