Wat is ʼn wintervakansie sonder sneeu?

As ons aan wintervakansie dink, kom die prentjie op van kinders wat in sneeu baljaar, sneeumanne bou of skiërs wat teen steil hellings afjaag. ʼn Warm vuurherd-kuier mag jou ook herinner dat dit wintervakansie is.

In ʼn land soos Suid-Afrika is sneeu egter ʼn skaars verskynsel en mense se soeke na sneeu word ʼn prioriteit. Net die idee om sneeu te kan aanskou, te voel of selfs te proe, vul die meeste van ons met groot opgewondenheid. Sneeu kan as inspirasie dien. Die dorpie: Hogsback in die Oos-Kaap was vir J.R.R. Tolkien die inspirasie om fantasie stories te skryf. As ons gelukkig is word die landskap jaarliks omgetower om soos iets uit ʼn ware feëverhaal te lyk as die sneeu begin val.

Wintervakansie sonder sneeu kan nie die beeld van ʼn ware, onvergeetlike vakansie voltooi nie. Sneeu bring vir my skoonheid sonder weerga. As die eerste sneeuvlokkies val en die aarde in wit lappe bedek word, tree verwondering dadelik in. Die beelde van sneeubedekte vlaktes is net skouspelagtig. Die sagte grys wolke met die skerp wit sneeu kom pluk aan jou hartsnare.

Sneeu wakker ook die avontuurlus aan en skep vir ons die geleentheid om te ski of sneeubord te ry. Die gevoel van vryheid as jy met hoë spoed teen die berg af gaan laat die adrenalien behoorlik vry. Die aktiwiteite laat ons harte vinnig klop. Die belewenis van sneeu laat my siel dans van vreugde!

Die stilte wat heers as sneeu die aarde bedek, is so besonders. Woorde ontbreek my dikwels om die gesig van die spierwit landskappe te beskryf. Jy ontsnap van die alledaagse gejaag en vrede en rustigheid spoel oor jou. Die sereniteit van ʼn wit sneeulandskap is voedsel vir die siel en laat ons eenvoudige vreugdes waardeer.

Die herinneringe van ʼn wit vakansie sal my altyd bybly. Die jongklomp se kapperjolle en vrolike geterg as ons sneeuengeltjies maak is die beste. Sneeubalgevegte tussen die niggies, nefies en vriende word gewoonlik afgesluit met ʼn stomende beker warm sjokolade voor die kaggelvuur. Dit is beslis hierdie oomblikke wat wintervakansie onvergeetlik maak. ʼn Wintervakansie sonder sneeu, los my met ʼn onvervulde gevoel.

So, ʼn wintervakansie sonder sneeu is vir my eenvoudig nie goed genoeg nie! Die ervaring van sneeu bied ʼn unieke, betowerende tyd wat nie op ander plekke beleef kan word nie. Wit wintervakansies bring skoonheid en betowering wat oud en jonk se harte aanraak. As jy enigsins die kans kry om die wonder van ʼn wit wintervakansie te beleef, maak seker dat jy dit nie mis nie!

Niks kom by ʼn wintervakansie vol sneeu nie!

©MarleneErasmus

06/06/2023

(437 woorde)

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag