22 Februarie – Vrydagoggend
dis agtuur in die môre
en die maan hang soos ‘n wit klip
in die lug;
duiwe flikkervlerk in kringe
– soheentoe en t’rug
die kwikstert trippel langs die geute
teen die dak;
in die ou boom met die skilferbas
klou ’n muisvoël aan ’n doringtak
van ver af kom ’n kolgans aan
(hy vlieg oor hoër hoogtes,
hy seil oor laer land)
en daar is noodkreet in sy skreeu:
die berge by Franschoek
is vanoggend aan die brand
maar hier’s dit agtuur in die môre
en die maan sweef soos ’n wit klip
deur die lug
terwyl die hemel dagbreekblou
en Brackenfell se duiwe
(nimmereindig)
in oeronthou se sirkels vlug
© Carma Shaw
23 Februarie 2019
16:28
Foto: Carol Botha
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
Maak 'n opvolg-bydrae
Jy moet aangemeld wees om 'n kommentaar te plaas.