Dorland

ek staar na die Kaapse somerveld
dis warm, droog, en lelik
die dorheid pluk-pluk aan my klere
die somberheid klim binne-in

die uitgerekte mediterreense somer
moes lankal noordwaarts wyk
maar hy steur hom nie aan die almanak nie

die veldgras is asgeel verbleek
die bergfynbos,
gewoonlik in ‘n sagte vaalgroen getooi,
lyk afgerem, geskakeer tussen geelbruin en ‘n afgeskeepte kakie

selfs die talle indringers lyk bedremmeld
moedeloos oorgegee aan die tierende suid-ooster
en die moordende bergwinde

berg en veld smag woordloos
na die eerste tekens van die najaar
na die kraakvars herfsoggende
die eerste frontale reën
en die kabbeling van die eerste bergstroompies

net soos my windverwaaide gemoed
moeg gestry
teen die heersende gety
hunker na die belofte van verkwikking

©️cs-mrt-25

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag