beterweter – (Goud)

beterweter – (Goud) Retha van Deventer

jou oë glinster 

skouers word kordaat pappegaaibors agtertoe getrek 

om indrukwekkend te lyk 

of skalks om meer suurstofspasie te bewerkstellig 

want 

tot groot konsternasie 

en frustrasie

het ander se woorde die vermoë 

om jou soos ‘n opgewende draaiorrel 

in die laat-ek-jou-vertel-rat se hoogste hiperboliese versnelling 

te laat babbel 

min wetend jou grootse stories is ongeloofwaardig 

(ek stel dit eufemisties) 

maar dit gee ek jou toe: 

laat ek jou vertel 

jy sal die vaaldam onder water kan deurswem met jou lang asem 

© Retha van Deventer, 30 Julie 2026

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag