DIT WAS GOED (met dank aan TT CLOETE )

DIT WAS GOED

(Met dank aan TT CLOETE)

Ek het die leë jogurtbakkies

met water gevul

met malvablomme, met laventeltakkies,

kappertjies geel en laggend oranje,

met kers- en tjokkabootliggies

tafel gedek.

Ek het die langsteelglas met mooiste servet

vir wyn Chapel Red

die tafel met skaapboud en slaaie bedek.

En dit was goed.  Baie goed.

 

Ek het kaalvoet in die brander

gesien hoe die lug en die wind verander;

die wit duin, die wit sand

die wit skuim, die wit skulp

die wit haai, die wit meeu

die sagte, sagte mis teen my wang ervaar,

vryheid geniet.

En dit was goed.  Baie goed.

 

Ek het die rooi voet

die dik voet,

die ou voet met

verdikte tone, verkalkte naels

In Engelse-sout water gebaai en getroos.

En dit was goed.  Baie goed.

 

Ek het die tee op die vloer, op die hout, op die bors

kos op die tafel, op die bord, op die baard

opgedroog,

geleer

ek is met stekels vereer

en elk afgepoleer,

geskuur,

met toewyding verklein.

En dit was goed.  Baie goed.

 

Goed is goed, ongeag.

 

Susan van Rensburg

30/01/2024