“Gee die hond wind”

Juanri

Brons-Gedigte

“Gee die hond wind!”

het oupa gesê

as my woorde vasgehak

in my gedagtes kom lê.

 

Whisky die brak

hardloop af in die straat,

maar altyd het oupa met mý gepraat!

 

“Maak ‘n kopskuif my kind,

en troetel die plek

van son en lag en wonderwerk!”

 

Nou hoor my siel net sy eie stem

wat sukkel oor my mond se kring

Wie sal dan nou die vrede bring?

 

“Gee die hond wind!”

My kopskuif moet nou

die vrede en vreugde

In my sielshart vertrou.

 

Al sou dit wees in die lag van ‘n kind

Waar ek my sielsgeluk weer vind

Koester ek dit en gee ek dit plek

want ek is oupa se seen bedek.