hervestiging (goud)

hervestiging

tevergeefs het ek probeer
om kameeldorings te verplant
(vir skuiling in die skaapkraal
of skadu vir ontheemde boslelies)
maar die blare het bly verlep
en die stamme aanhou verdor

ek weet nou dat ’n penwortel
wat diep deur rots sy pad gevind het,
in vrede gelaat moet word

my eie wortels –
ook diep in die aarde ingestoot –
was geanker op ’n plek
waar ek kon gedy onder die Namibson,
jaarringe bygekry het,
geknoets is deur swaarkry
en deur droogtes en storms verweer is
maar tog troos wyd kon sprei

maar ek is nie ’n boom nie

my wortelstelsel is losgewoel
(nie sonder skade nie)
my binnebas is onthul
maar ek groei weer kernhout
waar ek verplant is in nuwe grond

© Hester Steenkamp

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag