hunkering

op met die twee-spoor pad
deur ‘n droë mahobaspruit
oor geel-bank uitgrawings

verby groen soetdoringbome
met pienk kelkie-blomme fees
onder kameeldoring rustigheid

draai en swaai om bokdraai
deur turfkolle se deurtrap-gate
links teen bulte op met spoed

deur twee-paal plaashek poort
langs aalwyne met rooi en geel
tot agterplaas se sement stoep

groen mielie-lande se rollende veld
verby perdestalle waar perde runnik
deur bonsmara kudde met kalwers

bloekom-bos met dekades se werk
ou steengroef teen rooi uitgrawing
gebreekte damwal in diepe spruit

met tweespoor bergpas oor rant
kronkelend tot oor eerste kruin
daar staan my uitkyk-toring stil
daarvandaan kyk hy suid en noord
waar pietersburg se vlaktes toring
en soutpansberg se entabeni oord

daar het ek voete gevind en verloor
waar beeste vrek van uitlandse gif
boom en gesaaides vrek in droogte

waar kinders eerste keer perdry
hartseer van dood ervaar en ly
kinders mense word deur lewe

daar waar pap en kaiings kos is
en groenmielies lekker kan braai
skaap tjops uit die veld kan kom

waar duiwe en babers ook kos is
gebraaide bergfisant beter smaak
as kentucky braai hoender-vleis

ken jy die wêreld wat ek van praat
dan weet jy daar is soiets in elkeen
van ons wat boere-bloed kan dra

ken jy die varslug in mistige kloof
waar suurstofryke mistigheid heers
daar waar jy jou eerste bosbok sien

weet jy waarvan ek praat, jy en jy
waar mens so gelukkig is dat jy snik
trane oor klein reën-waterfonteine

daar lê my karakter uitgespel vandag
onder verpletterende kaalvoet-spore

©Teárlach