Sy klee haar met die lente
die Sandveld gooi haar lentekas se deure oop
en heel die vaalte word in kleur en geur gedoop
sy dra sout op haar lippe
ek proe sout op haar wang
sy laat sewe pelikane
bo Saldanhabaai hang
sy sprei daisies aan die voete van ’n rots en krans
sy maak ’n witkruisarend teen die blou swerfdans
lila bloei viooltjies
in die sand neffens klip
en pienk kroon haar vygies
waar hul oor rante glip
sy’t ’n truitjie, ’n kousie, ’n fluweeltjie-bloubek
dis die son wat haar gousblom se kelke oopvlek
daar by Langebaan se see
voel ek die weswind waai
oor die meer by die strand
vlieg sy haar witborskraai
en vir sover my oog kan sien tot hier waar ek staan
trek sy ’n bont sarong oor lend’ en skouers aan
© Carma Shaw
28 Julie 2018
2:33
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
4 Kommentare
-
-
Viooltjie
Dankie, Callie. Ek waardeer 😊
-
-
Loretta Szikra
Wow Carma dis so pragtig. Jy maak my sommer lus vir die lente! 😊
-
Viooltjie
Baie dankie, Loretta. Ons benodig nog ’n bietjie winter en dan kan die lente maar kom 😃
-
Maak 'n opvolg-bydrae
Jy moet aangemeld wees om 'n kommentaar te plaas.
Callie Vermeulen
Pragtig Carma - ek beleef elke kleur en tree-trap saam met jou.