Vuurfees
dit het gesmeul in die harte van mense
te teësinnig om mekaar te verstaan
dit het gevonk oor verdraagsaam se grense
en toe ’n pad van verskrikking gebaan
dit het begin met ’n vlam in die Vrystaat
eers het net gras en die bossies gebrand
maar die vuur het gewoed op die windmaat
en toe soos fakkels versprei oor die land
dit het geëindig in gloeiende stede
verkool tot reste van as en van roet
midde rookmis en skamele vrede
het iedereen vir die tweedrag moes boet
en dít, ons liewe kinders (sou julle ooit vra):
was die dood en verassing van Suid-Afrika
© Carma Shaw
01 Augustus 2018
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
Maak 'n opvolg-bydrae
Jy moet aangemeld wees om 'n kommentaar te plaas.