anderkant die spoor (SILWER)

anderkant die spoor

aan die verkeerde kant van die spoor

daar het my lewensspore begin loop

vele huisies met piepklein erwe voor

Jim Reeves wat op Sondae sing van hoop

kindertjies klein wat tot laat in die straat speel

pa slaap in stilte voor sy volgende skof

waar die Roepman eensaam skof uitdeel

getrou op sy fiets doen hy sy rondtes in die stof

wonderlike wye wêreld waar jy woon

kinders van klerke,  ‘shunters’ en voormanne

met drywers of stokers wat geen onderskeid toon

mengelmoes van spoorwegmense heel ontspanne

tot die dag dat jy grootoog skool moet betree

dan word die klas geskei in groepe – hoor

watter kant van die spoor bepaal die deursnee

bo-dorp, onder-dorp of anderkant die spoor

tog sien kinders nie altyd die spoorlyn

so gaan speel ons een sonnige somerdag

uitgelate waar die nuwe maats se liggie skyn

tot die oom wou weet waar ons bly: die uitslag

heel opgewonde: Kappertjiestraat oom Thuis

onverwags die verandering op sy gesig

“Ek soek nie spoorweg-scrap in my huis!”

verneder verjaag hy ons met woede op ons gerig

van toe af weggekruip in die biblioteek veilig

waar boeke my betroubare vriende geword het

vertroue in my medemens geknou en ontheilig

verplaas ek myself steeds in my eie kokon-net

©MarleneErasmus

29/04/2024

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag