Die Muur (OPDRAG 8)
Nuwe Digvorm: Quindiceòla – ‘n gedig met 15 reëls – 5 strofes van 3 versreëls elk.
(15 = quindici in Italiaans; quinze in Frans)
1. Skryf ‘n gedig, Quindiceòla, met presies 120 woorde – die titel ingesluit.
2. Die titel moet natuurlik invloei/‘n aansluiting vorm, met die eerste versreël.
3. Daar moet emosie/s voorkom in die gedig. (bv. liefde, haat, vreugde, neerslagtigheid)
4. Daar is geen verpligte of vaste rymskema nie – vryevers.
5. In die gedig moet die volgende ten minste een keer voorkom: Parentese, Antitese, Vergelyking, Polisindenton, Onomatopeë, Alliterasie.
Die Muur
strek hoog en breed en vêr
versper my pad en blok my denke
verwar en verstar my hande, my voete
met gebalde vuiste slaan ek in magtelose stadige aksie
teen die spierwit koue laag pleister van waar daar
– van agter die hoë muur – hoonlag en tarting opklink
met geboë hoof, sweet deurdrenk, angs wat soos bloed drup-drup
smeek ek my martelaars om ‘n pad, ‘n opening vir my te maak
my deur te laat; my weg te neem van hierdie martelmuur
waar ek staan, nikssiende – asof geblinddoek voor ‘n vuurpeloton –
wagtend op woorde wreed geuiter…“ek ken hom nie!”
verstote verraai verloën
‘n vuisvoos mens wat sterf keer op keer
geblinddoek gemartel gegesel gestenig
vergeet maar nie vergeef
©callie 2018
12 Kommentare
-
-
Callie Vermeulen
Baie dankie Anze! En so ook vir jou insette regdeur die kompetisie. Ons waardeer dit.
-
Anze
Ai Callie as jy weet hoe ek gebrand het om ook te kon deelneem, besef ek ook baie goed dat ek geen kans tussen julle briljante klomp sou staan nie. Die opdragte was van die begin af baie taai en weldeurdag. Ek moet elke deelnemer gelukwens met die hoe standaard van inskrywings wat geplaas is.
-
Callie Vermeulen
Anze, Ek kou klippe na elke plasing, en nog is dit nie die einde nie. Maar, dit was lekker om weer te kon deelneem en ook die nuwe Pendorings se werke te kon lees. Ek glo jy sal in volgende jaar se kompetisie 'n deelnemer wees.
-
-
-
-
Driekie
Sjoe Callie, hier het jy behoorlik uitgehaal en gewys. Pragtig
-
Callie Vermeulen
Baie dankie Driekie. Ek hoop dit bring darem 'n paar goedkeurende kopknikke - ons sal egter lank moet wag vir die resultate op ons skrywes voor ons kan glimlag (of trane stort). Mooistes vir jou.
-
-
Elroux
WOW uitstekend gedoen
-
Callie Vermeulen
Groot dankie Evanthe vir daardie wow. Ek waardeer dit opreg (en jou 'altyd-saamlees')
-
-
Viooltjie
Goeie werk, Callie ☺
-
Callie Vermeulen
Baie dankie Carma! Waardeer jou gereelde saamlees en kommentare.
-
-
Loretta Szikra
Wow Callie, n pragtige sterk emosiebelaaide gedig wat jy baie goed raakgepen het. ☺
-
Callie Vermeulen
Baie dankie Loretta... waardeer jou kommentaar en jou gereelde saamlees opreg. Sterkte vir jou.
-
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, dankie vir jou deelname aan die Pendoring 2 / INK kompetisie