Welkom, Besoeker
Welkom, Besoeker

Titel: Die Nagmaal

Deur Ronnie
Datum gepubliseer: 4 April 2019 Aantal woorde: 231 603 Kere gelees 11

Nagmaal is ʼn gewyde saak,
nie iets waaroor mens grappies maak,
maar daardie Sondag moet jul weet
sal ek nimmer nooit vergeet.

Ek het die nuwelinge gou opgemerk
waar hul ongemaklik insluip in die kerk.
Die pa en ma, dogter en seun.
stigtelik gaan sit een vir een.

Was Kleinboet nog nooit in die kerk
of was ou Belial aan die werk?
Ek sal seker nooit regtig weet
want hul weer sien kan ons vergeet.

Die diakens bedien die brood en wyn
die gemeente herdenk stil Sy pyn.
Dis stigtelik gewyd, soos dit moet wees,
ons herroep die bloed en gebroke vlees.

Uiteindelik is ons dors en honger stil
deur die sigbare tekens van Sy liefdeswil.
Diep onder indruk van die gewydenheid
het Dominee oor die gemeente uitgekyk

“Is iemand oorgeslaan?” het hy vir laas gevra
waarop Kleinboet uitroep “Ja Oom, ekke ja!”
In die geskokte stilte wat ons omvou
volg hy op met “waar’s daai waiter nou?”

Dit was nie bedoel as sakrament minag
toe elk siel in die kerk uitbars van die lag.
Ek glo ons Heer het ook ʼn humorsin.
Ek dink ook Hy kon nie sy lag bedwing.

Die Dominee het poging vir voortgaan maar laat vaar
die gemeente kon net nie hul gelag bedaar.
Ons Vader, weet ek, begryp dit goed
daar is mos vreugdelag in Sy reddingsbloed.

Dit het regtig gebeur vir die wat dalk wonder….




TEMAS
3 Kommentaar
  1. Riaan Palmer

    4 April 2019

    Haha! Oulik!
    Ek stem ook saam: Ek is ook vas oortuig dat die Here ‘n wonderlike sin vir humor het. Ek dink nie Hy sou vir ons een gegee het as Hy nie self een gehad het nie. 🙂

  2. Anze

    4 April 2019

    Pragtig, baie dankie vir jou bydrae tot die April 2019 projek

  3. Philna Buys

    4 April 2019

    Dit laat my dink aan die mense wat oor vir die eerste keer kerk toe gegaan het en Nagmaal is bedien. Die pa is nie saam nie en die seun kom verheug terug en se sy pa kan maar gerus volgende keer saamgaan want hulle bedien shooters daar! Ek is altyd baie bly vir humor. Hoop daar kom mooi inskrywings in met die humor kompetisie.

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 18
Kommentaar telling: 9

My gesin skilder My ma kan skilder, kon skilder. Rumatiek het die hande krom en vingers dom gemaak. Ouderdom het die oë swak en kleure en lyne dof gemaak. Sy het laat in haar lewe begin drink uit haar kunsfontein, maar hoe het sy nie gedrink nie! Groot slukke wat my huis se mure versier in elke vertrek ... nie net mý huis nie, maar al drie ons kinders sʼn, en sommer baie ander mense sʼn ook. My man se fontein borrel ongebruik. Daar is mos altyd eendag ... wanneer die kinders uit die huis is ... wanneer ons op pensioen is ... wanneer ons ons pas begin vertraag. Ons begin ons pas vertraag ... die kinders is uit die huis ... tyd loop uit. Diabetes steel stukkie vir stukkie sy sig en ongemerk begin sy hande bewe, soos dié van sy oupa, sy ma en sy broer. Gaan sy fontein te vergeefs borrel, of gaan hy, soos my ma, en ek, diep skep, laat in ons lewens? My oudste dogter skep bekers vol uit haar fontein. Sy teken geboue en paaie op rekenaarprogramme en geniet die presisie en wiskundige berekenings wat vereis word. Die gebou moet kan staan tot die aarde vergaan, en in dié pad mag daar nooit ʼn sinkgat val nie. Sy begin versigtig, soekend drink uit al groter wordende houers en teken pragtige meubelprente in my huis. ʼn Ou tafel wat ‘n belediging vir ʼn ashoop is, word die pronkstuk in die eetkamer.   ʼn Pot wat vergete en nutteloos in ‘n kas staan, word die fokuspunt in die sitkamer. Weggooi t-hemde , vloerlappe sê my ma, kry ʼn tweede lewe as ‘n lappiesdeken op haar bed. My jongste drink klein slukkies uit ʼn soortgelyke fontein as haar ouma. Op tekenpapier, met kwas en potlood, kryt en pastel, teken sy die mooiste prente. Prente? Nee kunswerke. Teken? Nee, dis meer as teken, sy skilder. Daar is nog baie leë kolle op die mure in my huis. Die vertrekke wat ousus met ou tafels en potte en dinge mooi maak kort nog iets – iets unieks – iets besonders – soos daai tekening van die uil wat sy in Graad 10 se kunsklas gemaak het ... of daai skets van haar gesig gekombineer met haar indiaan-spirit-animal wat sy vir haar Graad 12 kunseksamen ingegee het ... of daai skilder wat nog sluimer in haar hande en kunstenaarsiel. Jy begin vroeg, jy het baie tyd, drink diep my kind. En ek? Ek teken met woorde, uitroeptekens, vraagtekens, koppeltekens, kommas en punte ... op leë Word Document bladsye, ...op my laptop se wit skerm. Vir die grootste deel van my lewe het ek net vaal korporatiewe prente geteken – advertensies, persvrystellings, toesprake, pamflette, brosjures, interne nuusblaaie ... Ek kon myself nie help nie en het telkens die vaalgeit probeer inkleur, maar in die koue, grys wêreld van harde besigheid in die finansierings industrie, is swart en rooi syfers al kleur wat geduld word ... en my siel het stukkie vir stukkie gesterf. Maar nou ... nou het ek tyd ... die kinders is uit die huis ... ek werk nie voltyds nie .... nou wil ek drink ... diep drink uit my eie borrelende fontein .... ek wil kleurvolle, woordprente skilder .... op die leë wit skerm ... in Word ... op my laptop.

Horison Media

AfriForum – Trotse borg van INK dig/skryf kompetisie

FAK – Trotse borg van INK dig/skryf kompetisie

Die Afrikaanse Taalmuseum & -monument – Trotse borg van INK dig/skryf kompetisie

Gebruikers Aanlyn

0 Lid, 120 gaste aanlyn

Bydraes – Argief